細閱只需 4 分鐘
Johnson面試既時候，Sarah就係旁邊既搖搖木馬上揈下揈下，一時聽下Johnson講咩，一時望下窗外既石屎森林。
「Sarah，唔好意思要你悶咗陣，哈哈。係時候聽下你既故事，可唔可以先簡單分享下你既背景？」
「無問題呀！我係Sarah，係一個香港土生土長嘅90後，大學讀工程系，畢業之後喺投資銀行做咗一位小小職員幾年，之後出嚟創業做幼兒科學教育。十分之迂迴曲折，哈哈。」
「又真係幾曲折，咁你走過一條咁曲折既路之後，點解會想創辦SOBIZ？」
「我覺得每個人存在係世上都有能力同埋責任對社會發揮正面嘅影響力。我喺銀行工作嗰時都會有啲迷失，會去諗我對社會究竟有咩貢獻。當時我會覺得係唔係去慈善機構做嘢先算對社會有貢獻呢？我有呢個疑問其實歸根究底都係因為讀書嗰時冇機會了解社會商業或者社會企業呢個概念。
我哋希望透過SOBIZ令到香港嘅中學生同大學生可以提早了解社會商業既各個持份者和各個範疇，令佢哋想像到自己未來能夠成為社會企業家、創效投資者(impact investor)，甚至係政策上推動社會商業嘅一份子。」
「SOBIZ正正就係想令更多人知道傳統商業同慈善之外，其實仲有其他可能性。你點睇社會使命同商業利潤之間既關係？」
「商業利潤係企業足以生存同埋繼續營運嘅最低要求。我認為社會使命同商業利潤並無抵觸，如果企業都生存唔到又何來講社會使命呢？」
「你認為SOBIZ要點樣做先可以吸引多啲人去了解，甚至支持社會商業既理念？」
「要令大眾認同社會商業的理念，首先要令佢地充分了解社會商業既概念和定義，然後先可以分析和概括自己嘅睇法。SOBIZ做到嘅就係將唔同方位嘅資訊好貼地咁呈現出嚟比年輕人睇。認唔認同就視乎佢哋啦。我相信年青人係有獨立思考嘅能力，會自己做決定。」
「要做到呢一點，你覺得SOBIZ會需要咩幫助？」
「SOBIZ都算一間start up, 所以乜嘢類型嘅幫助都需要㗎。最需要嘅幫助就係要大家關注同share我哋嘅內容，十分之緊要！」
「創辦SOBIZ，你希望達到咩目標？又希望從中得到咩？」
「我希望呢個平台可以好真實咁呈現社會商業嘅各個部份，無論好與壞，亦都希望SOBIZ會呈現到社會商業生態圈嘅所有持份者。見到唔少現有嘅平台會集中討論社會創業家嘅歷程同埋經歷。我哋知道唔係所有年青人都淨係想創業，所以 SOBIZ嘅內容和訪問嘉賓會比較多同廣。我最大嘅興趣就係不斷咁學習，所以希望透過SOBIZ去學習更多。」
「老土都問下，你點解覺得自己適合做SOBIZ既創辦人？」
「任何有心同有毅力嘅人都可以勝任做SOBIZ嘅創辦人。優點方面，我自己心態都幾年青哈哈，可以盡量令到內容貼近我哋觀眾嘅思維。」
「好！咁以後就靠你兩個啦！掉番轉，你地有無咩問題想問我？」
「傾咗咁耐，其實我地好似仲未知你叫咩名？」Johnson知道呢個問題幾無聊，但又好想知。
「吓，連我個名都唔識？我咪就係SOBIZ囉。」
#SOBIZ #socialbusiness #社會商業 #社企